آخر الأخبارعالم الفن

الشاعر السوداني اللبيب طارق اللبيب في حوار فني خاص عبر صحيفة #شبكة_السودان_نيوز الإلكترونية

السودان نيوز : آية الغازي كشان

 

المبدع اللبيب طارق اللبيب شاعر سوداني متميز بالدوبيت والشعر السوداني ضيفنا اليوم بلقاء مميز متحدث عن الشعر السوداني وأساسيات الدوبيت والتحديات الواجهها في مسار حياته الفنية رغم تفوقه في دراسته والأول على دفعته وتميزة على وجهه الخصوص.
////
أهلآ وسهلٱ بك المتميز اللبيب طارق اللبيب عبر صحيفة شبكة السودان نيوز الإلكترونية في لقاء فني خاص.

* يا مراحب والله ، سعيد كل السعادة أكون ضيف في حضرتكم ، والتواصل معكم ، حبابكم ألف .

#في البداية حدثنا عنك بطاقة تعريفية أسمك ، نشأتك ، مراحلك الدراسية ، نبذة بسيطة!؟

* الاسم : اللبيب طارق مجذوب بابكر من مواليد (بربر – السعدابية 1996) .
نشأت وترعرعت في أسرة شعرية وأدبية فريدة ، أغلب أعمامي شعراء وأبوي الشاعر المعروف والروائي الفذ الأستاذ والوالد طارق اللبيب .
درست الأساس في مدرسة نور الإيمان القرآنية ، وثانوية الاميرية ، وجامعة المشرق .

#عرفنا أنك متميز في الجامعة والأول دائمٱ على مستوي دفعتك كيف قدرت توفق بين الدراسة والفن!؟

* في البداية كل شئ توفيق من الله عز وجل ، ومهتم بالكتابة لدرجة التميز ، ولكن لمن الامتحانات تقرب بحذف مواقع التواصل الإجتماعي وبوقف الشعر ، وبرجع ليهو بعد أخلص إمتحانات .

#هل حبك للشعر والأهتمام بالمجال الشعري على وجهه الخصوص له تأثير إيجابي في نجاحك وتميزك في كل المدارس الشعرية!؟

* الشعر بحر واسع شديد ، وأنا اكتر شئ مهتم بمرابيع الدوبيت ، بحس أنو بقدر أعيش بيهو الواقع وأتعمق بيهو في كل القضايا الاجتماعية لأنو بكتب مرابيع توعوية إجتماعية بتفيد الشباب .

#أستاذنا ومدرستنا الأدبية طارق اللبيب مدرسة عريقة وقديمة في الشعر والدوبيت بشكل خاص أكتسبت حب الشعر من الوالد حفظه الله ، هل هو أحد المدارس المؤثرة والبتميز اللبيب طارق اللبيب!؟

* هو السبب الرئيسي بعد توفيق الله عز وجل فيما أنا عليه اليوم ، هو كان مُلهمي الأول ، وكنت معجب بكلماتو وإبداعاتو وتميزو ، وأنا لا زلت أستقي من هذه المدرسة والموسوعة الشعرية ولم أروى بعد ، فالتحية له اولٱ وأخيرٱ .

#من منو أكتسبت الشعر والدوبيت وهل الوالد الروائي طارق اللبيب سبب نجاحك!؟

* نعم سبب نجاحي ، فأنا إكتسبت منه الشعر والقواعد والأساسيات والممارسة والتدريج ، ساعدني في كل حاجة ، لأنو هو أحد الشعراء الأفاضل إن لم يكن أفضلهم على الاطلاق .

#متي أعلنت وبديت رحلتك الفنية وكم كان عمرك لمن أكتشفت أنك شاعر!؟

* في العام 2011م وكان بسبب قصة بيني وبين صاحبنا كان باعنا بسبب بت المهم لقيت نفسي بكتب لي في قصيدة كاملة ، عرضتها على الوالد ومن اللحظة دي أكتشفني وأكتشفت نفسي .

#أستاذنا اللبيب طارق اللبيب أنت من أسرة فنية عريقة كيف خلقت لنفسك جو شعري وفني مختلف عن كل الأنماط المتاحة وخبرتك في المجال الشعري من 2011 ؟

* التكيف دايما بكون من الوالد لمن أنت وأبوك تكون عندكم نفس الهواية ، ما بتعاني من أي شيء ، لأنو الوالد هو الوحيد البحب يشوفك أحسن منو ، هو صحبي قبل ما يكون ابوي ، حفظه الله .

#الدوبيت نوع من أنواع الشعر وبتميز عن غيرو من الأنماط الفنية وأنت بممارستك للفن الشعري أثرت بخامة صوتك المميزة للمستمع ووصل لإدمان اللبيب طارق كيف قدرت تجسد صوتك في المساحات الفنية وأدي لقبول مختلف عن الشعراء السودانيين!؟

* بصراحة ما بفضل نفسي على غيري ، لكن دايمٱ بحب أكتب في الكلام الهادف ، البعالج قضايا ، النصايح والوصايا ، والحاجات البتكون مؤثرة في قلوب المستمعين ، وبكتب دايمٱ زي ما بقولو الحاجات البتجي في الوتر الحساس ، يعني قصيدة الوصايا ال28 أخذت صدى ، قصيدة المخدرات ، وقصايد كتيرة كانت مؤثرة جدا في الوسط الفني .

#الصورة البتعكسها من خلال طرحك الفني للشعر أو الدوبيت لمن تلقي بأحساسك الفريد والفن بجبرك تلبي إحتياجات المستمع علمٱ أنو بتعالج قضايا مجتمعية عبر الدوبيت!؟

* طبعا المستمع ده شئ أساسي في أطراف الشعر لأنك أنت بتلقي ليهو وهو بستلم رسائلك من حروفك ، فالمستمع مهما كان هو أهم شئ ، الاهتمام بمعالجة القضايا أولوية قصوى بالنسبة لي .

#الرسالة الفنية البتوجهها لجمهورك العظيم علمٱ أنو أنت مدرسة شعرية بتمثل كيان محبي الشعر !؟

* أول حاجة ديل ما جمهوري ، ديل أخواني ، أحبابي وأصدقائي ، ولولاهم ما كنت أنا أتذوق للنجاح طعمٱ ، فنجاحي نجاحهم في كل حرف أكتبو ، عشان كده أنا بحمد ربنا أنو أداني أخوان وأصحاب زيهم ، فالتحية ليهم أولا وأخيرٱ ، ومتمني الاقيهم كلهم والله .

#توجه تحاياك الحارة لمنو ..؟

* بوجة تحية مقدرة ليك أنتي أول ، وتحيه لصحيفة شبكة السودان نيوز الإلكترونية ، والتحية كل التحية لأسرتي الكريمة ، وتحية بحجم السماء لكل أصدقائي في كل منصات التواصل الاجتماعي ، الناس النضيفين والداعمين لي دايما فردٱ فردٱ ، والتحية لأهلي في الجابراب واهلي في بربر السعدابية ، والأخوان في عموم السودان الحبيب ..

#في خواتيم اللقاء الشاعر اللبيب طارق اللبيب ماذا تحب أن تقول!؟

* مبسوط جدٱ جدٱ وسعيد بأستضافتكم وحواركم الجميل ده ، وتواصلكم معاي بالدنيا والله ، وأن شاء الله دايمٱ من نجاح لنجاح ، سائل الله لي ولكم التوفيق والسداد ، والسلام عليكم ورحمة الله وبركاته ..

مقالات ذات صلة

زر الذهاب إلى الأعلى